(Tann)álfar og tröll

Nú er maður á vaktinni fyrir Jóhönnu, enda von á Stekkjastaur í nótt.  Brjáluð eftirvænting í gangi, enda hitti hún Gluggagægji um helgina í Heiðmörkinni með ömmu Unni.  Þar voru líka tröllastrákar (annar hét Grámann Rauðsokkuson, kallaður sokkasleikir af JR, og hinn var ónefndur.), sem engin vissi almennilega hvað voru að gera þarna.  Líklega bara að sjá til þess að jólasveininn drullaði sér heim aftur, enda var hann að stelast að heimann.  Allavega Jóhanna fékk nammigott og varð hrædd við tröllastrákana, allir glaðir samt.  Engir voru álfarnir í þessu boði, en á sama tíma var EA að leggja sín fyrstu drög að tannálfabúgarði heima í héraði.  Snáðinn er búin að rækta með sér tönn sem er orðin áþreifanleg í neðri góm.  Ekki veitir honum af að hafa þennan millimeter í öllu hátíðartottinu sem framundan er ...

Tæknileg mistök

  Veröldin er furðulegt fyrirbæri.  Margt sem fram fer í henni má flokka sem tæknileg mistök.  Annars finnst nú flestum nóg um notkun á þessu orðapari; tæknileg mistök.  Þar sem þau hafa verið notuð um allt og ekkert, síðan ummælin urðu heimsfræg á Íslandi.  Ég er hins vegar þeirrar skoðunar að notkunin sé hvergi nærri næg og því fer fjarri að hún sé á undanhaldi.  Enda er hér komið fram eitt mesta orðatiltæki hina síðari áratugi.  Málshættir og orðatiltæki gefa tungumálinu okkar gildi, og þegar fram kemur slík snilld er tilefni til endurútgáfu bóka um slík efni.  Þetta gæti t.d. litið svona út:
  Tæknileg mistök  Geysileg afglöp í starfi, þar sem siðleysi, siðblinda og ýmsir aðrir neikvæðir eiginleikar stjórnmálamanna birtast í síbrotum þeirra á tímabili sem þeir lenda í.  Orðatiltækið er svo upplagt að nota þegar sami aðil ætlar að trana sér fram á nýjan leik, eftir að hafa tekið út sína refsingu.
  Pæliði í því að maðurinn heldur að hann sé búin að taka út sína refsingu, bara af því að það stendur hvergi í einhverjum samþykktum um að svona gaurar eigi ekki afturkvæmt í pólítík.  Allir neikvæðu eiginleikarnir er allsráðandi ennþá og hamla manninum greinilega sýn, enda er framferði hans að skemma fyrir hans gamla flokki.  Eiginhagsmunirnir eru í hávegum hafðir, alveg sama þó það muni skemma fyrir öðrum.  Ósvífni og ekkert  annað.  Það auðvitað verður að stoppa þetta rugl, áður en það er orðið of seint.  Þá er löngu orðið tímabært að setja reglur sem lúta að hæfniskröfum alþingismanna.  T.d. væri þetta ágætis byrjun:
1.  Frambjóðandi má ekki hafa hlotið dóm sem hefur komið honum í "betrunarvist."
2.  Frambjóðandi þarf að hafa háskólapróf frá viðurkenndum háskóla.
3.  Frambjóðandi verður að hafa gott vald á ensku.

Hvað væru margir eftir ef þessar reglur yrðu keyrðar í gegn núna?

Ein litlar, tvær litlar, þrjár litlar bólur ...

... fjórar litlar, fimm litlar, sex litlar bólur
sjö litlar, átta litlar, níu litlar, tíu litlar bólur.
Og það sinnum 2 og þá erum við kominn með bólufjöldan í smettinu á syni mínum.  Svo er hann með ýmsar stíflur (erum hvorki að tala um ritstíflur né kárahnjúka), þær eru þó ekki í frárennslis-göngunum heldur meira í kringum aðveitukerfið.  Þetta býður upp á ýmis tilhlýðileg hljóð eða jafnvel hljóðmerki sem brjóta sér leið í gegnum þrútið aðveitukerfið í skjóli nætur.  Þetta er auðvitað mjög upplífgandi og gefur lífinu eitthvað auka gildi (sem ég reyndar er ekki alveg búin að fatta).  
  En það sem ég vildi sagt hafa er að Eggert Aron er sem sagt búin að fá arf í fyrsta skipti.  Hann erfði auðvitað hlaupabóluna af Jóhönnu Rakel.  JR er byrjuð á nýju deildinni á leikskólanum, og gekk það ótrúlega vel eins og aðrar breytingar sem hún þarf að ganga í gegnum.  Fleira var það ekki.

JEL

Notum góðærið, hækkum álögur á áfengi !

Halló!  Hvað er að?  Nú þegar flestir (og allir skynsamir) menn eru sammála því að við ættum frekar að leita leiða til að lækka áfengisverð [a.m.k. á léttum vínum og bjór] og helst koma hluta af vöruvalinu í almennar verslanir, þá eru þessi fáránlegu óform uppi.  Er búið að ákveða þessa þvælu, eða er þetta ennþá á augljósu (rang)hugmyndastigi?  Þegar stórt er spurt?

JEL

Tekjur ríkisins af áfengissölu gætu aukist um milljarð

Snemmbúin jólamatur ?

Hvað er í gangi hérna.  Er þetta í alvörunni?
Spurning um að hafa eitthvað annað en
svínakjöt um jólinn ...

Svín réðust á indverskan dreng og átu hann lifandi

Uppfærsla á leikskóla fyrsta í aðventu

  Um nýliðna helgi var Jóhannes Helgi ræstur til skreytinga.  Seríudagur.  Frúin hafði látið telja sér trú um að það væru síðustu forvöð, enda fyrsti í aðventu (fo#%$#& afgreiðslumaður í einni sjoppunni hafði tjáð henni þetta) .  Reyndar er fyrsti í aðventu nk. sunnudag eins og allir vita, en ég þurfti nú samt sem áður að festa upp seríur, hringi og hjörtu til að vera þóknanlegur þann daginn.
  Nú styttist í að Jóhanna Rakel verði færð upp á aðra deild, vegna gríðarlegs þroska og getu miðað við aldur.  Fer af Blásteini yfir á Glaðheima einhvern tíma í desember ásamt einni vinkonu sinni.  Þær eru í aðlögun og svona núna um þessar mundir.

JEL

Sofðu unga ástin mín ...

  Þokkalega skynsamt fólk er fljótt að læra einfalda leiki og finna leiðir til árangurs.  Eggert vinur minn hefur t.d. um nokkurt skeið vitað að með því að grenja svolítið og bera sig aumlega á háttatíma er hægt að fá annað foreldrið til að hanga yfir sér fullt vorkunnar (og climaxið að fá móðurbrjóstið, auðvitað). 
  Þar til í gær.  Þá var skemmtilegur leikur settur upp,  svona án múðurs-og-drullastu-til-að-sofna-system, afbrigði af super nanny.  Þetta fór í nokkrar lotur án þess að brjóst kæmu við sögu (hvorki berbrjósta spjaldastelpur milli lotna, né námunda leikmönnum á leiktíma).  Góð ráð dýr og allt það dæmi, en það var þrjóskan sem loksins skilaði sér og drengurinn sofnaði fyrir rest, þrátt fyrir brjóstaleysið.  Hugsið ykkur meðferðina!
  Dagur II, annar háttatími.  Let's get ready to rumble.  Nema hvað, gaurinn sofnaði bara í miðri fyrstu lotu?  Er þetta nú ekki einum og gott til að vera satt?

JEL

Jón landeigandi og aumingi fer á kostum

Þetta var í fréttum stöðvar 2 í kvöld, hvergi annars staðar
í heiminum hefur jafn einfalt stöðumat áður komið fram ...

JEL

Einn gamall, annar sjúkur.

  Þetta var nú nokkuð skrýtinn dagur í ýmsu tilliti.  Húsbóndinn var kallaður heim úr vinnu til að hafa hemil á sjúku barni sínu.  Á sama tíma var litli prinsinn færður til skoðunar vegna aldurs.  Í ljós kom að maðurinn er nú þegar orðinn töluvert yfir meðallagi, bæði hvað varðar stærð [7760 gr & 67,5 sm] og frekjutilburði.  Eftirlitsaðilinn sá meira segja ástæðu til að sprauta manninn niður.  Tilburðirnir beinast allir að sama markmiðinu, þ.e. að ná stjórn á öðrum vistmönnum fífuvalla og gjörðum þeirra, ásamt því að innleiða einhvers konar ''sleeping disorder'' á býlinu.  Ég held að öll þessi armæða og ranghugmyndir sem komu fram í kringum prófkjörin á skerinu hafi verið triggerinn hjá honum.  En það breytir ekki því að það er virkilega gaman þegar maður fær óyggjandi vitnisburð um að uppeldið sé á réttri leið.  Markmiðið er að logga fullburða frekjulurt inn á leikskóla fyrr en varir, enda flýgur tíminn óðfluga eins og óð fluga.  Jóhanna er hins vegar mjög hress miðað við útlit.

JEL

Ný bóla eða öllu heldur nýjar bólur hvarvetna

Jóhanna var í fríi frá leikskólanum í dag.  Hún kvartaði yfir magaverk í nótt og búin að vera í dag áfram kvartandi í dag.  Listinn hefur þó heldur lengst frekar en hitt, illt í fótunum og höndunum þ.e.a.s. "inn í þeim".  Þá erum við lika að tala um hita, beinverki og kláða útum allt.  Sjúkdómsgreiningin er hlaupabóla, enda spretta rauðar bólur upp eins og gorkúlur útum allt á Jóhönnu þessa stundina.  Ég verð nú að segja það að mér er mikill léttir að svona skyldi vera komið fyrir dóttir minni.  Ekki svo að skilja að ég sé haldin einhverjum ranghumyndum um hvað sé gott fyrir hana og hvað ekki.  Heldur að þetta ástand skýrir mjög svo annarlega hegðun hennar í gær, en þá var aðalmálið að klóra sér duglega í þjóhnöppunum undir því yfirskyni að hún væri að kitla sig !!!  Þetta er sem sagt viss léttir, þó skrýtið sé.  Af Eggert er það að frétta að 98,9% líkur eru á að hann fái svipaða útreið og Jóhanna, en smitleiðir eru hér margar og skilyrði góð...  Litla sálin er hér dæmd og í ofanálag er móðir hans farin að troða graut í andlit hans í kjölfar okkar matartíma.  Hann hefur alla mína samúð.
Það eru ekki alltaf jólin í þessu, þó senn komi þau.